Faglegt efni
Er VSK uppgjör sérstaks saksóknara í samræmi við lög?
Svar dómsmálaráðherra við fyrirspurn Össurar Skarphéðinssonar leiddi eitt og annað í ljós. Umfang aðkeyptrar þjónustu, sem ber með sér að hafa verið keypt án virðisaukaskatts, vakti athygli okkar.
Á þessum vettvangi hefur verið fjallað um óskýrar reglur um virðisaukaskatt af þjónustu sem keypt er erlendis frá. Hafa allnokkrir þurft að sæta endurálagningu skatts, sex ár aftur í tímann, hafi þeir ekki hagað uppgjöri virðisaukaskatts af erlendri þjónustu í samræmi við túlkun skattyfirvalda á hverjum tíma.
Á tíðum hefur sú túlkun þótt breytast eftir stefnum og straumum hverju sinnu, sem væri í lagi í sjálfu sér, ef slíkar breytingar fælu ekki í sér endurálagningu skatts afturvirkt.
Eins og oft áður kalla góð svör við einni spurningu á enn fleiri spurningar, til dæmis:
- Í svari dómsmálaráðherra kemur fram að öll erlend sérfræðiþjónusta sé án virðisaukaskatts. Greiddi embætti sérstaks saksóknara ekki örugglega virðisaukaskatt af hinni aðkeyptu erlendu þjónustu?
- Í svari dómsmálaráðherra kemur fram að þjónusta Evu Joly sé án virðisaukaskatts. Kann að vera að Evu Joly hafi borið að skrá sig á virðisaukaskattsskrá hér á landi og skila virðisaukaskatti af seldri þjónustu sinni?